"جايبلك عريس"

كلمة استهلالية .. ربنا يعلم قد ايه بقيت بقفش منها قفشة الصوف فى المية السخنة

وكأن اللى بيقولها بيقولك خبر بمليون جنيه.. زى مثلا طردنا السفير ولغينا كامب دايفد .. أو جاتلك بعثة فى انجلترا .. أو التلات سنين اللى فاتوا من حباتك كانوا حلم ورجعتى تانى اجازة تالتة كلية..

طبعا كل ده مش صحيح

بس ليه بقى اللى جايب عريس أو اللى جايبة .. بتبقى حاسة انها بتخدمنى خدمة العمر
وان الديب جالى متعلق من ديله فى ايده كدهه على طول على بيتنا

وساعات مش على بيتنا على حسب نوعية الديب ودماغ اللى جايبه

مش من حقك أصلا تتناقشى .. وفى الغالب كمان مش من حقك ترفضى .. بس لازم لازم لازم تحسى بالامتنان و تقدرى النعمة على حد قول الست "مامتشى"

"العريس مضمون مية مية .. ووالله لايقلك".. الغريبة ان اللى بيقول العبارة دى بمنتهى الثقة هو أصلا ما يعرفش ايه يليقلى

ولا يعرف أنا بفكر ازاى .. ولو هرش فى دماغهاوى ممكن كمان ما يكونش يعرف هو نفسه لايقله ايه .. والأنكى والنيل انه ممكن ما يكونش يعرف العريس ده ايه صنفه أساسا

المطلوب كالآتى: البسى .. واتشيكى .. واتهيأى .. واتكسفى وخلى خدودك تحمر .. وخليكى كلك رقة وروحى اقعدى مع العريس

ولو اهلك وافقوا ..اضمنى انك وافقتى .. يا من الزن .. يا خوفا من العنس

وكل تدبيسة وانتوا بألف خير..

نوافيكم بالمستجدات قريبا .. يا جمهورى العزيز : أنا .. ونفسى .. ودماغى

اللى راح

اللى راح كان المفروض يجى ..

عشان نتعلم منه حاجة ؟؟

جالنا عشان يدينا رسالة.. ومشى على طول اول ما الرسالة وصلت ..

هو نفسه مش عارف انه كان بيوصل رسالة من فوق .. ميعرفش انه مدرس كان محطوطله منهجوطريقة تدريس.. خلص حصصه وخد بعضه وروح..

بنفضل فترة بعد ما يمشى يعيد حسابتنا عشان نفهم الرسالة .. عشان نستوعبها .. عشان تأثر فينا..

بنفضل فترة تايهين عشان نعرف نحط رجلنا على الطريق الصح...

بنتعتر وبنقع علشان ناخد بالنا من الحفر والطوب اللى فى الطريق..

هدومنا بتتوسخ لما بنقع عشان نقدر قيمة شكلنا الحلو بهدومنا النضيفة .. وان شكلنا ما بيبقاش وحش اوى وهدومنا متوسخة..

ونعرف كمان ان فى ناس معندهاش هدوم اصلا .. وفى ناس هدوما حتى وهى متوسخة أنضف بكتير من هدومنا حتى وهى نضيفة..

بنتعر عشان عضمنا ينشف .. ومناعتنا تزيد ودمعتنا تبطل تبقى قريبة ..

الدرس ساعات بيطول .. اما لانه مهم قوى ما ينفعش يتقلب فى حصتين ..

أو لأننا مخنا تخين ما بنفهموش بسرعة .. أو علشان السببين دول مع بعض .. او عشان عشرميت سبب تانى منعرفهمش ..

ومش شرط نعرفكل حاجة على فكرة...

فىحاجات لو عرفناها هنتعب.. وحاجات لو عرفناها مش هنفهم منها حاجة .. وحاجات لو عرفناها مش هتفرق معانا فى حاجة

وحاجات مش عارفينها دلوقتى وهنعرفها بعدين..

وحاجات مش عارفينها دلوقتى .. ومش هنعرفها بعدين..ولا لينا علاقة بيها ..والدرس أصلا كان لناس تانيين واحنا اتلقينا فى السكة عشان ناخد حصة ببلاش.. من غير امتحان .. واستفدنا بحاجة واحنا مش حاسين..

بس فى المجمل اللى راح راح

مش هيرجع تانى لو وقفنا نستناه..ده الاحتمال الغالب..

لو رجع يبقى فيه حاجة فاضلة لسه نتعلمها منه..

المهم ما نشغلش نفسنا أوى باللى راح ..

هو نفسه مش عارف راح ليه.. وجاى تانى ولا لأ.. وقاعد يضربها خمسات فى ستات زينابالظبط

ولو فاكر انه فاهم يبقى حمار..

ومينفعش نفكر كتير فى حد حمار ..

اللى جاى احلى .. او مش احلى مش مضمون ومش مهم .. المهم ان فى جاى نعيشلة بأمل .. بس كده

( إبتسامة عريضة اوى)

قعدوا الستات فى البيت .. أما نشوف

من اين اتت فكرة ان المرأة تصلح للبيت وان الرجل اصلح للعالم الخارجي ؟

سؤال سألته واحدة صاحبتى .. غاوية تدخل فى نقاشات من دى توجع القلب ومش مضمون هتودى لفين .. بس لو بعدنا عن التابوهات .. هنطلع بشوية أفكار عليها القيمة..

أنا بقى دخلت المناقشة متاخر

وأقدر أقول ان لو قريتوا التعليقات من اولها لآخرها هتفهموا فعلا ليه الوضع كده

عشان احنا بنفترض العجر فى الستات .. الضفع المطلق اللى يخليها متقدرش حتى تدافع عن نفسها فى نطاق العمل .. وأنا بشتغل بقالى سنتين من ساعة ما تخرجت .. وبتدلاب من أولى كلية .. وأقدر أقول ان ده غير صحيح

ومن ضمن الحاجات اللى الست بتتعرضلها غيرة الرجل من زملاءها فى نجاحها فى الشغل .. نوع من الغيرة مش نابع من المنافسة .. انما نوع مرضى نابع من التمييز العنصرى

أنا أعرف ان كلما ارتقى الانسان بفكره وعقله وثقافته .. كلما قلت النوعية دى من الأفكار المتطرفة .. وقل احساسه بالملكية

كمان غسيل الأطباق مش مهين .. انت لو عايش لوحدك هتعمل كل ده لنفسك أو هتجيب خادم باجر .. وزمان ايام الرسول كان فيه جوارى وخدم وعبيد بيعملوا الأعمال دى .. أ ى حاجة زيادة الست كانت بتعملها .. كانت ذوقيا منها

الفكرة مش فى ده فى حد ذاته .. الفكرة فى انك تلاقى الطرف اللى يقبل شروطك فى العلاقة عن طيب خاطر وليس اضطرارا .. أنا اعرف سيدات ما بيتحملوش فكرة انها تخرج برا البيت تشتغل .. وبتحس انها اهانة ليها ان الراجل ميتعبش هو ويصرف ويوفرلها مستوى تقبله ..

انا اقصد بكلامى ده نوع من الخوف والغيرة المرضية اللى ما تقدرش تفصلها كتير عن حب التملك .. واللى أعرفه ان الحب معيار نسبى .. انا اعرف واحدة سابت خطيبها عشان هو مبيسألهاش رايحة فين وجاية منين واتأخرتى ليه وما بيقلبش فى الموبايل ،، ده نموذج موجود وده مفهومها للرجولة

لكن الرجولة أكبر من كده بكتير .. الراجل بيحمى بس ما بيأذيش .. بيحتوى بس ما بيحرقش .. بيتحمل المسؤولية بس بعقل مش بتسلط

فى ظل مجتمع الولد فيه مبيبذلش مجهود عشان يوصل لحاجة الا من رحم ربى .. معدش ينفع نقول الست تقعد فى البيت .. مطلقات مصر مينفعوش يقعدوا فى البيت .. أرامل مصر مينفعوش يقعدوا فى البيت .. السيدات اللى ملهومش عائل لأى سبب مينفعوش يقعدوا فى البيت .. حديثى الزواج اللى تقبلوا ضيق الحالة المادية لشريك الحياة وكرموا اعتماده على نفسه مينفعوش يقعدوا فى البيت

لما الولد يدخل جامعة بابا هو اللى بيصرف عليه ويتحايل عليه عشان يذاكر - أخذا فى الاعتبار ان غالبية أوائل الجامعات اناث - بعدين يقعد فى البيت وببا يجيبله واسطة عشان يشتغل أو يشغله معاه ، ثم بابا يجيبله شقة ويوضبهاله .. وبابا يجوزه ويجهزه .. وأحيانا بابا يساعده فى مصروف البيت اول سنين جواز
هو ده اللى أنا اقصده


 مفيش حاجة اسمها ده ميقدرش يعمل إلا كذا وده ميقدرش يعمل إلا كذا .. دى تقيمات مجتمعية .. وبتتباين بتباين الأفراد .. فى رجالة كتير زوجاتهم بيموتوا او بيسافروا إعارة والبيت بيمشى مية مية

ولما تكوى قميصك بنفسك وتعمل لروحك كباية شاى ده مفيهوش انتقاص من رجولتك .. بس فيه اكتمال لانسانيتك

أعتقد المشكلة هتتحل لما نبطل نبص للعلاقة بين الرجل والمرأة على انها علاقة ندية .. يجب أن يسود فيها طرف .. والنظر ليها على أنها علاقة شراكة ..
احترام متبادل .. واستعانة على الأيام بالاتناد واللجوء للآخر

بسطوا المور وبلاش الوقفة على الواحدة.. بلاش التطرف من كلا الطرفين ..بلاش الاستغلال .. لا الست تستغل الراجل عشان يحققلها طموحها المادى على حساب استمتاعه بحياته .. ولا الراجل يستغل الست فى تغذية كبرياؤه بإن فى طرف ضعيف هو قادر يسيطر عليه

واللى بيبص بس على نظرة المجتمع ليه سواء بلد او بنت وبيحسبها بدماغ الناس
أعتقد ان الواحد بيعيش عمر واحد .. بيجرب فيه حاجات كتير .. لوطالبت بالنجاح فى كل حاجة تبقى خيالى .. ولو خفت بالفشل من كل حاجة تبقى متشائم .. ولو مشيت ورا الناس من غير ما تفكر تبقى هوائى .. وفى كل الحالات دى .. هتعيش حياة حد غيرك .. مش هتعيش حياتك انت
مع انك هتدفع الثمن من رصيد أيامك وسنينك انت .. تخيل بقى حجم الخسارة!!

الفجر ..لما اليوم بيموت عشان يتولد منه يوم جديد

اليوم بيودع نفسه اهه .. بيودع كل الأحداث الحلوة اللى حصلت فيه..
بيودع كل الحداث الوحشة اللى حصلت..بيبكى على حاجات وبيضحك على حاجات ..
بيفتكر حاجات فاكر ان عمره ما هينساها..

وناسى حاجات يمكن يفتكرها بعدين ويمكن ما يفتكرهاش خالص..

الأدان بيدن .. ادان الفجر .. اللى هو نفسه بيفكرنى بحاجات متناقضة وسخنة وساقعة وعكس بعض لدرجة انهم بيتخانقوا..

عامل زى الولادة فى صعوته فى خطورته..فى جماله وفى إعجازه..

ليا ذكريات كتير أوى مع الفجر ده..

كان اول واحد يحب معايا من طرف واحد ويبكى ..

واول واحد يحب من طرفين ومبسوط وقلبه بيرفرف..

وأول واحد يخيب أمله معايا فى نتيجة الثانوية العامة.. وفى حاجات تانية اهم وحاجات ملهاش أى لازمة فى الدنيا..

واول واحد يفهم معايا ادايه أنا عبيطة اوى .. وعاقلة أوى ..

واول واحد يتصدم معايا فى ناس كتير..

واول واحد يبكى معايا من لوعة الانكسار .. من لوعة الشوق .. من لوعة الجرح .. من لوعة الفراق .. من لوعة الكبرياء .. من لوعة الصدمة .. من لوعة فقدان الأمل .. من لوعة الفشل .. من لوعة البكا نفسه..

وأول واحد يتعلم معايا ان البكا ما بيحلش مشاكل .. وان عدم البكا ما بيداويش جروح ..

وان اللى بيمسح دمعتك مش دايما حبيب .. واللى بيبكيك مش دايما عدو..

الغربة

الغربة

الغربة بتعلمك وبتعلم عليك فى حاجات كتير

بتعلمك الوحدة .. بتقتل جواك إحساسك بالناس من كتر ما بتقسى عليك.

بتقتل إحساسك بإنك عايز تشارك يومك مع حد من كتر ما بترجع تلاقيك قاعد تقسم اليوم وتطرحه وتجمعه جواك لوحدك..

بتقتل احساسك بانك محتاج حد .. من كتر ما بتبقى فى عز كسرتك لوحدك مابتلاقيش حد واقف معاك غير انت ونفسك..

بتكوى قلبك كل ييوم بالوحدة .. بتكوى عقلك بالصمود فى وش الغربة .. بتكوى مشاعرك باحساسك بنفسك بس .. وبالوحشة..

بعد ما كل دول بينكووا .. بعد ما تدوق مرار الصبر والدمع والوحدة والحاجة والوحشة ما عدتش بتحس بحاجة..

كل اللى جواك بيخلص.. حتى احساسك نفسه بيخلص.. قلبك بيخلص.. الناس اللى بتيجى بعد كده لومعرفوشيداووك بالعافية – أيوة بالعافية لأنك مينفعش حد يدواويك بالذوق – لو معرفوش مش هيدخلوا قلبك .. مش هيلاقوا قلب .. مش هيلاقوا غير باب مقفول ..

نفس الباب اللى كنت على الناحية التانية منه بتخبط .. بتعيط .. بتعافر .. بتتحايل .. بتجاهد .. بتنازع عشان تخرج للناس من نفس الباب ده هيلاقوك قافله عليك بميت قفل .. مفاتيحهم انت نفسك مش عارف شايلها فين..

هيلاقوك قافل عليك بابك ده .. وقاعد جوه .. ما بتضحكش وما بتبكيش .. ما بتفرحش ومش زعلان.. ما بتحبش وما بتكرهش .. مش محتاج ومش مستغنى..

عايش فى شعور الـ "ولا حاجة" .. مشاعرك ولا حاجة .. قلبك مش حاسس بولا حاجة .. يمكن خوف .. يمكن قوة .. يمكن ولا حاجة

بس كله على بعضه شعور مش لطيف..

"كتر الهجر .. يعلم القسية"

كلمة

لانى ما اتعودتش آخد موقف سلبى قررت انى أبقى ايجابية وأكتب كل اللى أنا عارفاه والمنطق اللى بفكر بيه عشان اللى مش فاهم وجهة نظرى يبتدى ياخد باله منها واللى مش مستوعب الناس اللى فى التحرير دى ايه رسالتها يبتدى ياخد باله
أول حاجة لازم تاخدوا بالكوا منها ايه المطالب بتعات الثورة أصلا عشان نشوف ايه اتحقق منها (ان كان فى حاجة اتحققت أصلا) وايه اللى ما اتحققش:
مطالب الثورة كالآتى:
-تنحى محمد حسنى مبارك عن الحكم نهائيا


2-إقالة الحكومة وتشكيل حكومة وفاق وطنى سريعا من شرفاء البلد


3-حل مجلسى الشعب والشورى وإجراء انتخابات حره ونزيهة فى اقرب فرصة


4-إطلاق سراح جميع المعتقلين السياسيين ممن ليس عليهم احكام جنائية


5-محاكمة كل رموز الفساد والمستفيدين منه وحصر ثرواتهم ومصادرتها لخزانة الدولة


6-الغاء قانون الطوارئ فى البلاد


7-تشكيل لجنة من خبراء الدستور وأساتذة القانون الشرفاء وكبار القضاه للعمل على صياغة دستور جديد


8-إجراء تعديل فورى فى المواد المعيبة فى الدستور 66 و67و5و88و 179 لضمان انتخابات رئاسة حره


9-الغاء كل القرارات التى فرضة بها الحكومة الجباية كقانون الضرائب وقانون المرور والسيارات


10-تنفيذ كل احكام القضاء واحترامها واعادة هيبته كسلطه مستقله


11-إلغاء كل الاتفاقيات التى تمس امن وسلامة او تضره فى اقتصاده


12-توفير حد ادنى من الاجور 1200 جنيه لضمان حياه كريمة لأهل مصر


13-محاربة الغلاء الفاحش الذى حل بالبلاد وعدم ربط رفع الاجور بغلاء العيشة


دلوقتى الناس بتقول ايه لو مبارك مشى الفوضى هتعم البلد .. يعنى هو لو كان مات وده وارد .. الأعمار بيد الله كانت البلد ماتت .. ولا كنتوا هتتبسطوا ان جمال يمسك البلد هو وأحمد عز ؟!!!
طيب الفوضى اللى حاصله دى سببها الناس اللى فى التحرير ولا سببها ان الناس كانت بتقول سلمية سلمية واتضربوا برصاص مطاطى ورصاص حى وقنابل مسيلة للدموع وعربيات وبتجرى تدوس الناس تحتها
وبعدين تنسحب الشرطة من الشوارع .. ويكلموا المستشفيات يقولولهم ان تقارير الطب الشرعى فى اللى ماتوا تقيد على انها حالة تصلب فى الشراييين!!!!

طيب الناس دى لو رجعت بناء لى خطاب الريس اللى ما قالش فيه ان جمال مش هيترشح ولا حط اى اطار زمنى يتم فيه تنفيذ المطالب  دى وما ذكرش فيه آليات تعديل الدستور ولا الحد الأدنى للأجور ولا كل المواد اللى عايزة تتعدل ولا حتى قال ان ده بناء على مطالب الشعب الشرعية

لأ بكل استعلاء بيقول انا لم أكن انوى الترشح

وتعالى عن انه حتى يوجه كلمة عزاء لأهالى الضحايا المكلومين

بالنسبة بقة لاشكالية ان الدستور بتاعنا ما بيشتغلش من غير ريس زة ما الريموت كده ما بيشتغلش من غير حجارة

فى اختراع كده اسمه حكومة انتقالية أو حكومة ائتلاف وطنى اللى مش عارفها يدور على معناها فى جوجل الحكومة دى بتقود البلاد لمرحلة انتقالية معلومة المدى وبتقوم فيها باجراء كافة التعديلات المطلوبة بدأ بحل مجلسى الشعب والشورى ( اللى احنا عارفين انهم غير شرعيين ) ثم اجراء انتخابات عادلة ذات اشراف قضائى ودولى بتنتخب فيها بالرقم القومى وتسمح للمغتربين اللى برا البلد انهم ينتخبوا برده .. ثم تعديل الدستور بعد كده .. ثم اجراء انتخابات رئاسية وترجع البلد لحالتها الطبيعية

السيناريو التانى : ان الريس يفضل:

تفتكروا لو فى حكومة بتفكر بعقلية ما طول 30 سنة هتتغير العقلية دى فى يوم وليلة

وتفتكروا الريس لما يتنحى ده اهانة ليه؟ لأ طبعا عبد الناصر تنحى اعترافا منه بغلطته وتحمل المسئوليى امام الشعب فالشعب وثق فيه ورجعه تانى لأنه ذا مصداقية

ثانيا لو عمر سليمان خد مقاليد الأمور زى ما الناس بتقترح .. بحكم المادة 82 والمادة 84 من لدستور الريس ممكن يقلب عليه ويقولوا طير انت فى اى وقت وساعتها ابقوا قابلونى

لمل بقى ان حكاية تعديل الدستور بتحتاج وقت وان الحكومة بتاخد خطوات .. احنا عندنا 32 وزير ما اتغيرش منهم غير 14 وكلهم برده من رحم النظام السابق يعنى تغيير وشوش والمخاخ هى هى واللى مش مصدقنى يروح يشوف وزير المالية الجديد قال ايه


لما النظام نفسه اعترف انه فاسد انتوا بتدافعوا عنه ليه

ولما واحد يجى يقول فيها ايه اما تصبروا 6 شهور هقوله : لو واحد فضل يكدب عليك 30 سنة وانت قلتله كمان 6 شهور ما يضرش يبقى انت اهبل

ولما الريس حكم 30 سنة شبطان فى 6 شهور ليه

ولما هو خايف يمشى عشان الفوضى حطنا فى الفوضى ليه من الأول

ولما هو بيقول دى دولة مؤسسات ازاى تقع لو هو مشى .. مش الكلام ده متناقض

ولما هو مخه كبير اوى كده شبطان فى الست شهور ليه

ولما اديله 6 شهور يعمل حكومة ويرجع نفس الجهزة البايظة اللى قبل كده : أمن الدولة والشرطة والداخلية بنفس السلوكيات اللى قبل كده وأكيد أشرس تفتكروا الناس اللى كانت فى التحرير دى هتروح ورا الشمس ولا معتقلات كوكب زحل ؟؟

وشعب ايه اللى هيثور تانى ان شاء الله ده انتوا هتتربوا تربية رسمى .. واللى هيقول حسنـــ .. فى الشارع هيتعلم عليه وده أكتر تعبير مؤدب ممكن يوصف اللى هيحصل

أما بقى انه يحكاملى احمد عز وحبيب العادلى ... فلامؤاخذة ده شغل استعباط .. ما هو أحمد عز موجود من زمن وفى ناس تانية كتير منهم علاء ابنه كانوا مشاركينه ... دول كباش المحرقة اللى بيرميهم حسنى زى ما رمى هشام طلعت مصطفى قبل كده لما زعل منه

الحل ان الحكومة دى تتفض ونبنى من أول وجديد لأنهم لو كانوا ناويين خير ما كانوش لغاية دلوقتى متحفظين على المعتقلين اللى اتمسكوا فى المظاهرات ..

اللعبة دبوقتى لعبة عض الأصابع بين الشعب والحكومة واللى يقول " آى" الأول يطلع بره

وأى حد فى الدنيا يفضل انه ياكل ويشرب ويتفسح على انه يعيش فى دولة نضيفة وياخد حقه يبقى توصيف تانى غير انه بنى آدم

آخر حاجة بقى حتة الأجندات الخارجية:

هو فعلا الأجندات والنتايج والأقلام بتتوزع اول كل سنة بس ما كنتش فاكة ان الموضوع عامل عقدة كده

تفتكروا لو أمريكا عايزة تدخل مصر هتستناكوا لما تقولوا مش عايزين بابا حسنى وماما سوزان؟
لأ كان ممكن امريكا تدخل مصر تحمى حقوق الإنسان بصور وملفات تعذيب المساجين من اقسام الشرطة والمعتقلات .. وكان ممكن تدخل مصر بعد تزوير الانتخابات عشان تحمى حرية الرأى والتعبير .. وكان ممكن تدخل مصر بتلفيق ملف نووى زى ما عملت فى العراق اللى كلكوا خايفين تبقوا زيها .. وممكن تدخل دلوقتى عشان تمشى حسنى لأن الشعب مش عايزه .. حسنى مبارك اللى نصح صدام بالاستقالة عشان يحمى شعبه من الغزو الأمريكى

لو أمريكا عايزة تدخل مصر هتدخل غصب عن عين اتخن تخين فى مصر

اما بقى عن التنظيم الجامد والحركات المنظمة التكتيكية اللى الثورة بتتحرك بيها.. فعلا حقكوا تستغربوا .. لأن الحكومة معوداكوا بقالها تلاتين سنة ان انتوا شعب غبى وقبيح ومهرجل وما بيحترمش اشارة ولا بيقف ف طابور .. فاستغربتوا ازاى متظاهرين ينضفوا شوارع ويشتغلوا مرور .. واسعاف .. وشرطة .. ولجان شعبية .. ويحموا المتحف .. ويعملوا كماين للبلطجية

الناس اللى قومت الثورة دى اعمارهم من 15 ل 35 سنة يعنى معظم اللى بيقروا دلوقتى بيفكروا زيهم وعارفين ان جوا كل واحد منا فكر بس مش عارف يطلعه لأنه بيتشتم وبيتهزق وبيتكتم على أنفاسه ل ما يجى ينطق

لو كل واحد فيكوا فكر لو هو فى موضع المسؤلية والقدر على احداث التغيير هيطلع منه ايه.. هيفهم ان مش غريبة الطريقة المنظمة اللى هما بيشتغلوا بيها ومش محتاجة يتدربوا فى البنتاجون ولا الموساد عشان يعملوا اللى بيعملوه

وفى النهاية : لكل غاية ثمينة ثمن ثين يدفعه الأحرار ويأبى عنه العبيد .. اختار تبقى حر وتتعب شوية ولا ترجع لحظيرة النظام تانى لأجل غير مسمى؟!!!

جلسة

جلسنا سويا
وصندوق الأمس مترب الاركان ثالثنا
كتاب الجراح والضحكات مطويا
باتقان

فتحنا خزانة المائة الف عام
فعام الحب ألف عام
وألف عام الحب ألفى عام من الذكرى ولست بأحصى
فالاحصاء فى الذكرى لا يجوز
والامعان فى الماضى لا يجوز
ونبش قبور رماد الحب الخامد لا يجوز


قلت احترق الحب
قلت نسيت ..سليت..شفيت
كذبت
وأخذتك أخذة الكرامة وكبرياء الرجال
وكذبت بدورك..وقل انك ما احببت وأن بنار الفراق ما انكويت
وضحكت


أصبحنا نقلب وجه التاريخ يمينا وشمالا
ونفند أخطاء القصة مثنا وثلاثا ورباعا
وتقول وأقول
وكأن فتاة وفتى غيرنا عشناها
تتكلم عنى فتؤازرنى مرة وكانك غريب عنك وتعنفنى مرة وكأنك غريب عنى
احدثك عنه وعنك وأقول انت تارة وهو مرارا

أرصدنا بعين غير عينى
وأروينا لسانا ليس لى
اقول هى لأتحدث عن نفسى
وأقول كان وأنت كائن أمامى
فالحب جنون .. والكره خطيئة ..والنسيان ادعاء

أحببتك بقلب تاه منى
بعين غفلت
بعقل ليس لى
ونسيت

أحببتنى بقلب لا يحب
بعين لا ترى
بعقل لا رزين

جلسنا سويا .. نداعب احرم المستقبل المنسية
وتحكى عنها وتحكى عنى وعن أخريات
تنادى بقايا الدمع بعينى .. وتستفز بفكرى الذكريات
وترصد سهام العتاب لديك ما بقى بقلبى لك من نبضات

فلا استطاع ادعاء التناسى الصمود امامى
ولا استطاع تصنع التباهى بغزوك العاطفى أن يزعزع فكرى
ولا استطعت ساعة التجلى أن تثبط عزمى
عزمت الرحيل
عزمت الرحيل
عزمت الرحيل
فإليك عنى