ما حبيتكش!

محبيتكش


أصل يا ابنى فى واحدة حبت واحد بتحمد ربنا انهم افترقوا؟


فى واحدة عاقلة .. كانت بتحبك .. تقول إنها كانت بتحب بهبل .. ده إن كانت بتحب أصلا؟!!


فى واحدة لما يسألوها حبيتى فيه ايه تقول .. لو حبيته .. يبقى حبيت فيه خوفه عليا
والحنية..
طيب حبتك إزاى دى؟




ما حبيتكش




صدقنى لو حبتك .. كانت انحرقت بضوء الشمس لما اتعكس على دبلتك..


كانت ضحكت من قلبها على نكتتك .. حتى لو بايخة..


ماحبيتكش


لو حبتك .. ما كانتش جت واترجتك..
وبعدها بيوم  - لما هجرت - نسيتك..


لو حبتك .. ما كانتش سابت نمرتك ..
وكلام انكتب فى محبتك ..
ووهى بتكتب أول قصيدة ذم .. فيها هَجٍتك!


لو حبتك ما كنتش مسحت كل ده بعد ما الدموع جفت بشهر..
أصل اللى بيحب بيمسح وهو مجروح..
وهو قلبه كله قهر


مش بعد ما ينداوى


ما حبيتكش..


أصلها لو حبتك .. كانت اتلككت وكلمتك..
كانت استغربت لما سمعت رنتك..
مش لأنك بتتصل ..
لأن الرنة بتحاول تفكرها بحاجة مش فاكراها فعلا..
لأنها فعلا نسيتها ونسيتك..


لو حبتك كانت افتكرتك..
وأما شافتكش ما تجاهلتكش
لأنها أصلا ما شافتكش..


لأنها أصلا ما حبيتكش!